Недостигот од чипови и струја ја кочи експанзијата на вештачката интелигенција, предупредува OpenAI

Главниот оперативен директор на OpenAI, Brad Lightcap, предупреди дека недостигот од мемориски чипови и ограничувањата во енергетските ресурси во САД претставуваат сериозни пречки за понатамошното ширење на инфраструктурата за вештачка интелигенција.

Говорејќи на форум во Вашингтон, тој посочи дека токму меморијата во моментов е најкритичниот ресурс за индустријата, додека во претходниот период главен предизвик била електричната енергија. Сѐ поголем број технолошки компании алармираат дека недостигот од мемориски чипови може да влијае врз цените и развојните планови, особено поради растечката побарувачка за напредни системи за вештачка интелигенција.

OpenAI, заедно со други компании, значително го зголеми купувањето на специјализирани процесори од Nvidia Corp., кои вклучуваат големи количини меморија неопходна за функционирање на четботи и комплексни AI апликации. Поради тоа, компанијата активно работи на диверзификација на своите добавувачи и на проширување на дата-центар капацитетите во различни региони, со цел да ја забрза изградбата на нова инфраструктура.

Амбициите на OpenAI се значајни, со оглед дека компанијата претходно најави инвестиции од околу 1,4 трилиони долари во дата-центри и чипови во наредните години. Овој силен инвестициски бран, заедно со слични потези на други технолошки гиганти, врши дополнителен притисок врз глобалните енергетски системи.

Во обид да ги задоволи идните енергетски потреби, OpenAI разгледува повеќе извори на енергија, вклучително и нуклеарна. Компанијата веќе води разговори со Helion Energy, стартап за нуклеарна фузија поддржан од извршниот директор на OpenAI, Sam Altman. Алтман неодамна најави дека се повлекува од управниот одбор на Helion за да избегне потенцијален судир на интереси во тековните преговори.

Lightcap нагласи дека улогата на владите ќе биде клучна, особено кога станува збор за инвестиции во енергетската инфраструктура, која е неопходна за развојот на индустријата.

Воедно, OpenAI го засилува и своето присуство во јавниот сектор. Компанијата веќе соработува со повеќе од еден милион вработени на локално, државно и федерално ниво во САД, а неодамна постигна договор за имплементација на своите AI модели во класифицирана мрежа на американското Министерство за одбрана, откако Пентагон ја прекина соработката со конкурентот Anthropic PBC.