Тензиите во Персискиот Залив го принудија Кувајт да го намали производството на нафта

Кувајт, петтиот најголем производител на нафта во рамките на ОПЕК, го намали производството на нафта и работата на своите рафинерии поради сериозното намалување на бродскиот сообраќај низ Ормускиот теснец. Овој потег е дел од поширокиот бран на намалувања на енергетското производство во регионот на Персискиот Залив, предизвикан од растечките безбедносни ризици и тензии на Блискиот Исток.

Кувајтската државна нафтена компанија соопшти дека одлуката следи по, како што наведуваат, континуираните закани од Иран, вклучително и предупредувањата поврзани со безбедноста на бродскиот сообраќај низ Ормускиот теснец. Намалувањето на производството започнало во саботата со околу 100.000 барели дневно, а според извори запознаени со плановите, можно е постепено дополнително намалување во зависност од капацитетот на складиштата.

Прекините во производството во регионот придонесоа за раст на цените на нафтата на светските пазари. Цената на нафтата во Лондон достигна највисоко ниво во последните повеќе од две години, приближувајќи се до 93 долари за барел. Причина за тоа е серијата нарушувања во снабдувањето од земјите во Персискиот Залив.

Ирак веќе го намали производството откако транспортот на нафта низ Ормускиот теснец речиси запре, што доведе до брзо полнење на складиштата. Во меѓувреме, Саудиска Арабија ја затвори својата најголема рафинерија, додека Катар го прекина работењето на најголемата фабрика во светот за извоз на течен природен гас по напади со беспилотни летала.

Кувајт во јануари произведувал околу 2,57 милиони барели нафта дневно, според податоците на пазарните анализи. За оваа земја Ормускиот теснец е единствената поморска рута за извоз на нафта, што ја прави особено ранлива на нарушувањата во сообраќајот низ овој стратешки поморски премин. За разлика од Кувајт, Саудиска Арабија успеа дел од своите испораки да ги пренасочи кон терминалот Јанбу на Црвеното Море.

Покрај намалувањето на производството, Кувајт започна и со намалување на преработувачките капацитети во своите рафинерии поради брзото пополнување на складиштата. Трите главни рафинерии во земјата – Ал-Зур, Мина Ал-Ахмади и Мина Абдула – имаат вкупен капацитет од околу 1,4 милиони барели дневно. Меѓу нив, Ал-Зур се смета за една од најголемите рафинерии на Блискиот Исток.