Кинескиот гигант BYD со ултрабрзо полнење се обидува да го запре падот на продажбата

Кинескиот производител на електрични возила BYD претстави нова генерација батерии и значително побрза технологија за полнење, обидувајќи се да го запре падот на продажбата на домашниот пазар. Компанијата, која во моментов е најголемиот производител на електрични автомобили во светот, на настан во Шенжен ги претстави најновите „blade“ батерии и систем за ултрабрзо полнење што овозможува батеријата да се наполни од 10 до 70 проценти за само пет минути, додека речиси целосно полнење може да се постигне за околу девет минути. Од компанијата истакнаа дека дури и при многу ниски температури времето на полнење се зголемува само минимално, што претставува значително подобрување во однос на претходните генерации батерии.

Претседателот на BYD, Ванг Чуанфу, нагласи дека замената на возилата со мотори на фосилни горива со електрични автомобили е клучна за енергетската безбедност на државите, особено во време на глобални геополитички тензии и нестабилност на нафтените пазари. Според него, компанијата има долгогодишно искуство во развојот на батерии и токму оваа технологија претставува една од најсилните страни на BYD.

Новиот технолошки пакет доаѓа во период кога компанијата се соочува со пад на продажбата во Кина. Во првите два месеци од годината продажбата се намалила за повеќе од една третина во споредба со истиот период минатата година, при што BYD ја загуби водечката позиција на кинескиот пазар од конкурентот Geely. Падот на побарувачката се поврзува со укинувањето на дел од државните субвенции за електрични возила, намалените стимуланси за замена на старите автомобили, како и со послабата економска активност во земјата.

Во рамки на настанот компанијата претстави и неколку нови и освежени модели од своите серии Dynasty и Ocean, како и од луксузниот бренд Yangwang. Меѓу нив се издвојува новиот спортско-корисен модел Datang, кој според компанијата може да помине до 950 километри со едно полнење. Новите батерии првично ќе се вградуваат во десет модели од понудата на BYD.

За да го поттикне интересот на купувачите, компанијата најави и бесплатна услуга за брзо полнење во период од една година. Дополнително, BYD планира значително проширување на инфраструктурата за полнење, со цел до крајот на годината да изгради околу 20.000 станици за брзо полнење, од кои 2.000 ќе бидат поставени долж автопатите. Компанијата размислува дел од оваа инфраструктура да ја прошири и на странските пазари.

И покрај амбициозните најави, дел од аналитичарите предупредуваат дека дел од технологиите претставени на настанот веќе биле најавувани во претходните години, но сè уште не се широко комерцијализирани. Првата генерација на ултрабрзо полнење, претставена во 2025 година, беше достапна само кај два модели, кои заедно остварија релативно скромна продажба во споредба со вкупните испораки на компанијата.

Сепак, BYD се надева дека новите технологии ќе помогнат не само во зајакнување на позицијата на домашниот пазар, туку и во понатамошно проширување на глобалната продажба. Недостатокот на инфраструктура за полнење во многу земји сè уште е една од главните пречки за поширока употреба на електрични автомобили, па компанијата смета дека токму решенијата за побрзо полнење можат да ја зголемат привлечноста на ваквите возила. Во меѓувреме, извозот на BYD продолжува да расте, а компанијата има амбиција во 2026 година да продаде околу 1,3 милиони возила на странските пазари.