Apple го претстави MacBook Neo од 599 долари и влегува во сегментот на поевтини лаптопи
Apple Inc. го претстави новиот MacBook Neo со почетна цена од 599 долари, што претставува најсилен чекор на компанијата досега во сегментот на поевтини лаптопи и директен предизвик за Windows компјутерите и Chromebook уредите. Со оваа цена, моделот е за 400 долари поевтин од досегашните најдостапни нови Mac лаптопи и значително под актуелниот MacBook Air, кој стартува од 1.099 долари.
MacBook Neo доаѓа со 13-инчен екран, што го прави еден од најкомпактните лаптопи на Apple. Уредот работи со A18 Pro чип, процесор кој првично беше развиен за iPhone, што е првпат компанијата да интегрира чип од паметен телефон во Mac компјутер. Овој потег ѝ овозможи на Apple да ја намали цената без значително да ги жртвува перформансите за секојдневни задачи како интернет прелистување, обработка на текст, уредување фотографии и видеоповици.
Основниот модел нуди 256 гигабајти меморија, додека верзијата од 699 долари доаѓа со двојно повеќе простор и Touch ID за најава и потврдување плаќања. За образовни корисници се предвидени дополнителни попусти, со што почетната цена може да се спушти на 499 долари. Лаптопот нуди батерија со траење до 16 часа, 8 гигабајти RAM меморија, шестјадрен процесор и петјадрена графика, без можност за дополнителни надградби.
Иако е позициониран како подостапен модел, MacBook Neo задржува алуминиумско куќиште, целосна тастатура и тракпад, поддршка за WiFi 6E, Bluetooth 6 и 1080p FaceTime камера. Уредот располага со две USB-C порти и приклучок за слушалки, а се испорачува со полнач од 20 вати. Ќе биде достапен во повеќе бои, со што Apple очекува да привлече студенти и поширока публика, но и деловни корисници кои бараат поекономично решение компатибилно со macOS и iPhone апликациите.
Иако на пазарот постојат поевтини Windows и Chromebook уреди, кои се движат од 200 до 600 долари, Apple го позиционира Neo како попремиум алтернатива со подобар дизајн и повисоки перформанси, особено во делот на обработка на задачи поврзани со вештачка интелигенција. Компанијата смета дека новиот модел ќе донесе нов бран купувачи во нејзиниот екосистем, што може да отвори простор за дополнителна продажба на други уреди како iPhone, iPad и Apple Watch.
Лансирањето доаѓа по послаба празнична сезона за Mac линијата, при што продажбата опадна за 6,7 проценти и достигна 8,39 милијарди долари, под очекувањата на аналитичарите. Со MacBook Neo, Apple прави значаен стратешки исчекор кон поширока публика, а најавува и дополнителни иновации подоцна годинава, вклучително и Mac со екран чувствителен на допир.
