Нафтата експлодира над 80 долари додека Блискиот Исток влегува во нова фаза на војна

Цените на нафтата продолжија да растат откако Соединетите Американски Држави и Израел ја интензивираа воената кампања против Иран, додека Техеран се закани со целосно затворање на Ормускиот теснец и изврши напад со беспилотни летала врз американската амбасада во Ријад.

Глобалниот репер Брент се искачи над 80 долари за барел, откако во понеделникот забележа скок од околу седум проценти. Американската сурова нафта West Texas Intermediate се движеше околу 73 долари за барел, што дополнително ја потврдува нервозата на енергетските пазари. Пазарите реагираат чувствително на секоја нова ескалација, стравувајќи од прекин на снабдувањето од Блискиот Исток.

Американскиот претседател Доналд Трамп изјави дека САД ќе направат „сè што е потребно“, додека државниот секретар Марко Рубио најави дека воените операции ќе бидат дополнително засилени. Овие пораки беа протолкувани како сигнал дека конфликтот нема брзо да се смири.

Во меѓувреме, американската амбасада во главниот град на Саудиска Арабија беше цел на напад со две беспилотни летала. Според саудиското Министерство за одбрана, предизвикан е ограничен пожар и е причинета помала материјална штета, без информации за жртви. Претходно, Стејт департментот ги повика сите американски државјани да го напуштат Блискиот Исток поради сериозни безбедносни ризици.

Дополнителна загриженост предизвика изјавата на советник на командантот на Иранската револуционерна гарда, кој предупреди дека иранските сили ќе нападнат секој брод што ќе се обиде да мине низ Ормускиот теснец. Овој стратешки премин е клучна артерија за глобалната трговија со нафта, бидејќи низ него минува значителен дел од светското снабдување.

Конфликтот, кој избувна во саботата и брзо се прошири низ нафтено богатиот регион, веќе предизвика сериозни потреси на енергетските пазари. Покрај нафтата, нагло пораснаа и цените на природниот гас и нафтените деривати, вклучително и дизелот. Растот на енергенсите отвора простор за нов инфлаторен притисок на глобално ниво, особено во земјите зависни од увоз на енергија. Поскaпе и јагленот, што дополнително ја илустрира ширината на пазарната реакција.

Ескалацијата на тензиите во регионот кој произведува значителен дел од светската енергија ја става глобалната економија во состојба на неизвесност, а инвеститорите внимателно ги следат следните чекори на Вашингтон и Техеран.