Деценија подем: САД станаа најголем светски извозник на LNG

Десет години откако од Луизијана исплови првиот извозен товар со течен природен гас, САД се трансформираа во водечки светски снабдувач со овој енергенс. Она што започна како амбициозен енергетски проект, денес претставува столб на американската енергетска стратегија, со капацитет што продолжува забрзано да расте.

Пресвртницата се случи на 24 февруари 2016 година, кога Cheniere Energy го испрати првиот LNG товар од терминалот Sabine Pass, означувајќи нова ера за американската гасна индустрија. Во годините што следеа, САД ги надминаа традиционалните гиганти како Катар и Австралија и се позиционираа како најголем извозник на течен природен гас во светот. Денес, според податоци на американската Администрација за енергетски информации, земјата преработува околу 18 милијарди кубни стапки гас дневно во LNG.

Експанзијата е поддржана од изобилството домашни резерви, релативно ниските трошоци за суров гас и флексибилните договори за извоз. Дополнителен поттик дојде од зголемената европска побарувачка по руската инвазија врз Украина, кога европските земји се свртеа кон алтернативни извори за снабдување со гас. Поволната инвестициска клима овозможи брзо проширување на инфраструктурата за втечнување и извоз.

Според најавените планови, американскиот капацитет за втечнување би можел да достигне 28,7 милијарди кубни стапки дневно до 2029 година, што е повеќе од двојно зголемување во однос на почетокот на 2024 година. Индустриските проценки укажуваат дека вкупниот извозен капацитет би можел да се удвои во рок од пет години, што отвора прашање дали глобалниот пазар, кој веќе покажува знаци на заситување, ќе може да ги апсорбира овие количини.

Меѓу најголемите играчи се Cheniere Energy и Venture Global LNG, две од трите најголеми светски компании во овој сектор. Cheniere во изминатата деценија инвестирала околу 50 милијарди долари во проширување на своите капацитети и планира да го зголеми производството на 100 милиони метрички тони годишно до средината на 2030-тите. Од 9 милиони тони годишно оперативен капацитет на крајот од 2016 година, компанијата денес достигнува околу 52 милиони тони и продолжува да ги активира новите линии во Corpus Christi.

Иако LNG секторот бележи годишен раст од околу 3 проценти, според проценките на индустриски лидери, динамиката на проширување го надминува растот на глобалниот пазар на гас. Тоа создава потенцијален ризик од прекумерна понуда во наредните години, особено ако побарувачката во Европа и Азија се стабилизира или опадне.

САД, сепак, засега остануваат клучен столб на глобалната енергетска безбедност. Прашањето што останува е дали пазарот ќе може да го следи темпото на американската експанзија или индустријата ќе се соочи со нов циклус на ценовни притисоци и консолидација.