Индија се позиционира како нов глобален играч преку сојуз со Бразил за ретки минерали

Бразил и Индија потпишаа рамковен договор за соработка во областа на критичните минерали, со што двете земји најавија поинтензивна заедничка работа на преработка и развој на одржливи синџири на снабдување. Договорот доаѓа во период на сериозни глобални потреси на пазарот на ретки минерали и засилена геополитичка конкуренција.

Индискиот премиер Narendra Modi по средбата со бразилскиот претседател Luiz Inacio Lula da Silva во Њу Делхи изјави дека новата соработка ќе придонесе за создавање поотпорен и сигурен синџир на снабдување со суровини клучни за модерната индустрија. Лула престојуваше во тридневна посета на Индија, во време кога двете економии настојуваат да ја зајакнат својата стратешка позиција на глобалната сцена.

Бразил располага со вторите најголеми резерви на ретки земни елементи во светот, што за Индија претставува важна алтернатива во обидите да ја намали зависноста од Кина. Овие минерали се суштински за производство на електроника, технологии за чиста енергија, батерии, полупроводници и одбранбени системи.

Договорот се надоврзува на пошироките амбиции на Њу Делхи да стане центар за високотехнолошко производство и клучен фактор во новата глобална економска архитектура. Индија не сака повеќе да биде само пазар или извор на евтина работна сила, туку се стреми да се позиционира како главен светски играч во стратешките индустрии на иднината. Вклучувањето во иницијативи за зајакнување на синџирите на снабдување со полупроводници и критични минерали е дел од таа поширока стратегија.

Покрај економските интереси, соработката меѓу Бразил и Индија има и геополитичка димензија. Двете земји настојуваат да се наметнат како влијателни гласови на земјите во развој и да обезбедат поголемо влијание врз технолошките и трговските правила што го обликуваат новиот светски поредок.

Дополнителен поттик за продлабочување на односите беа и трговските тензии со САД. Откако администрацијата на Доналд Трамп воведе високи тарифи, а потоа дел од нив беа поништени од Врховниот суд и заменети со нова глобална царина, неизвесноста околу трговската политика на Вашингтон ги охрабри Бразил и Индија да бараат постабилни и долгорочни партнерства меѓу себе.

Со најновиот договор, двете земји испраќаат порака дека не сакаат да останат само извозници на суровини, туку да инвестираат во преработка и повисока додадена вредност. За Индија, тоа е уште еден чекор кон амбицијата да стане клучен глобален центар за технологија, индустрија и стратешки ресурси во наредните децении.