Турција подготвува драстично заострување на казните за пазарни измами и манипулации со инвестициски фондови

Турската влада подготвува построги санкции за пазарни измами од оние што првично беа предложени, велат извори запознаени со процесот. Нацрт-законот е ревидиран со цел да опфати и лица кои не учествувале директно во манипулации на пазарот, но сепак оствариле корист од нив. Изворите, кои побараа да останат анонимни бидејќи станува збор за нејавни разговори, наведуваат дека новите одредби ќе се однесуваат и на лица или компании за кои постои „разумно сомневање“ за измама, вклучително и активности поврзани со инвестициски фондови, врз основа на извештаи на регулаторот.

Според предлог-измените, значително ќе се зголемат и паричните казни што прекршителите можат да ги платат за да избегнат одредени судски постапки. Наместо досегашната фиксна сума од 500.000 лири, казната би изнесувала двојно повеќе од износот на противправно стекнатата добивка. Уште во ноември беше објавено дека нацрт-законот предвидува зголемување на затворската казна за пазарна измама од три на пет години, при што овие пресуди нема да можат да бидат одложени.

Процесот на ревизија започнал минатата година, откако одредени турски инвестициски фондови оствариле невообичаено високи приноси, што поттикнало сомнежи за можна манипулација. Министерот за финансии Мехмет Шимшек тогаш изјави дека властите се свесни за одредени злоупотреби и дека ќе работат на зајакнување на регулаторната рамка. Од Министерството за финансии засега нема официјален коментар.

Претседателот на регулаторната агенција во декември порача дека ќе се спречи „недоличното“ користење на инвестициските фондови, без да открие конкретни имиња. Нацрт-законот, кој сè уште може да претрпи измени или целосно да биде повлечен, се очекува во наредните недели да биде доставен до парламентот на разгледување.