Пазарите нервозни – секој сигнал за ескалација ја поскапува нафтата

Цените на нафтата продолжија да растат по најголемиот дневен скок од октомври наваму, откако расте загриженоста дека тензиите меѓу САД и Иран би можеле да прераснат во нов конфликт. Нафтениот пазар реагираше чувствително на сигналите за можни воени сценарија на Блискиот Исток, регион кој обезбедува околу една третина од глобалното производство на сурова нафта.

Цената на северноморската нафта Брент се искачи над 71 долар за барел, додека американската нафта се движеше над 65 долари, продолжувајќи го силниот раст од претходниот ден. Според Axios, можно е наскоро да започне голема американска воена операција во регионот, додека властите во Израел наводно поддржуваат сценарио кое би довело до промена на режимот во Техеран.

Во исто време, директорот на Меѓународната агенција за атомска енергија соопшти дека Иран разговарал за можноста повторно да дозволи инспектори во своите нуклеарни објекти, но тоа зависи од поширок договор за нуклеарната програма. Преговорите засега не донесоа конкретен напредок, иако Техеран зборува за начелен договор со Вашингтон, а се очекува нов предлог да биде претставен на разговорите во Женева во наредните недели.

Аналитичарите предупредуваат дека ситуацијата се движи кон нова ескалација. Според проценките на RBC Capital Markets, засиленото присуство на американски воени сили во регионот, заедно со неодамнешните ирански поморски вежби во Ормускиот теснец, укажуваат дека ризикот од воен судир значително се зголемува. Аналитичарката Хелима Крофт оценува дека нерешените спорни прашања меѓу двете страни ја туркаат ситуацијата кон директна конфронтација.

Потенцијалниот конфликт би можел сериозно да ги загрози испораките на нафта од регионот, што дополнително ги загрижува инвеститорите. Сепак, ваквиот развој на настаните носи и политички ризици за американскиот претседател Доналд Трамп, бидејќи растот на цените на горивата би можел да предизвика незадоволство кај гласачите во пресрет на изборите за Конгресот.

Зголемената неизвесност веќе се чувствува и на пазарот на нафтени деривати, каде што инвеститорите сè поагресивно се заштитуваат од можен нагол ценовен скок. Сѐ повеќе трговци се обложуваат на сценарио со високи цени, што покажува дека пазарот сериозно ја пресметува можноста за нова геополитичка криза на Блискиот Исток.