Европската батериска индустрија под притисок: ACC се откажува од фабриките во Италија и Германиј

Плановите за создавање силна европска батериска индустрија добија уште еден сериозен удар. Automotive Cells Company, компанијата што требаше да биде еден од носечките столбови на европската електромобилност, се повлекува од најавените инвестиции во Италија и Германија.

Според информации објавени од италијанскиот синдикат на металурзи, раководството на ACC ја информирало синдикалната страна дека проектот во Термоли нема да продолжи, а во исто време е запрен и развојот на фабриката планирана за германскиот пазар. Со тоа, пропаѓаат две инвестиции што беа замислени како дел од пошироката стратегија за намалување на европската зависност од увоз на батерии.

ACC е заедничка иницијатива зад која стојат Stellantis, TotalEnergies и Mercedes-Benz, и долго време беше претставувана како европски одговор на доминацијата на азиските производители. Компанијата доби и силна политичка поддршка од институциите на ЕУ, токму поради улогата што требаше да ја одигра во обезбедување на стратешка автономија во клучниот сегмент на електричните возила.

Сепак, пазарната реалност се покажа поинаква од првичните очекувања. Продажбата на целосно електрични автомобили во Европа расте побавно, а автомобилските производители сè почесто ја коригираат стратегијата и се насочуваат кон хибридни решенија. Во такви услови, големите и долгорочни инвестиции во нови батериски капацитети стануваат потешко оправдливи.

Откажувањето од фабриките во Италија и Германија отвора сериозни прашања за темпото и насоката на европската електрична транзиција, како и за способноста на Унијата да изгради сопствена индустриска основа во сектор што сè повеќе се смета за стратешки.