Светските цени на храната паднаа петти месец по ред, покажува ФАО

Светските цени на храната продолжија да се намалуваат и во јануари, што претставува петти последователен месец на пад, соопшти денес Организацијата за храна и земјоделство на Обединетите нации (ФАО). Според најновите податоци, индексот на цените на храната, кој ги следи промените на глобалниот пазар на основни земјоделски производи, во просек изнесувал 123,9 поени, што е за 0,4 проценти пониско од декември и за 0,6 проценти пониско во однос на истиот месец лани.

Малите промени во цените на житарките покажуваат дека пазарот останува стабилен, иако постојат локални варијации. Во јануари, цените на житарките бележат скромен раст од 0,2 проценти, иако се забележува пад на цените на пченицата и пченката во некои региони. Големите глобални залихи на пченица ја ублажија несигурноста предизвикана од неповолните временски услови во Русија и САД, додека стабилните резерви на пченка го смируваат пазарот и го ублажуваат влијанието на сушата во Аргентина и Бразил, како и силната побарувачка за етанол во САД.

Цените на растителните масла, напротив, покажаа раст од 2,1 процент во текот на јануари. Палминото масло поскапе поради сезонското намалување на производството во Југоисточна Азија и стабилната глобална побарувачка, додека цените на соиното масло се зголемија заради намалена понуда од Јужна Америка и очекуваната силна побарувачка од американскиот сектор за биогорива.

Пазарот на месо забележа благо намалување на цените од 0,4 проценти, пред сè поради пониските цени на свинското месо, што беше резултат на изобилство на глобална понуда и послаба меѓународна побарувачка. Најизразен пад е забележан кај млечните производи, чии цени се намалија за пет проценти во однос на декември, со посебен акцент на поевтинување на сирењето и путерот.

Индексот на цените на шеќерот забележа пад од еден процент, што е поврзано со очекуваното зголемување на понудата, особено поради закрепнувањето на производството во Индија и поволните прогнози за Бразил и Тајланд.

Покрај анализата на цените, ФАО објави и ажурирани проценки за глобалното производство на житни култури во 2025 година. Според овие проценки, производството треба да достигне рекордни 3,023 милијарди тони, поттикнато од историски високи приноси на пченица, груби зрна и ориз. Како резултат на тоа, глобалните залихи на житни култури би можеле да се зголемат за 7,8 проценти и да достигнат рекордно високо ниво, што укажува на силна поддршка за стабилноста на пазарот и обезбедување доволни резерви за светската потрошувачка.