Европските пазари под притисок поради кварталните извештаи на големите компании

Европските берзански индекси денес се во пад, додека инвеститорите внимателно ги следат резултатите од кварталните извештаи на големите компании и банки. На пазарот се забележува стабилен раст на цените на златото, што укажува на зголемена побарувачка за безбедни средства во услови на неизвесност.

Оваа недела, најголемо внимание привлече финансиската извесност на водечките европски компании, меѓу кои LVMH, фармацевтскиот гигант Novo Nordisk, нафтениот конгломерат Shell, како и најголемите банки во регионот, пренесува CNBC.

Најголем пад денес бележат акциите на Stellantis на берзата во Милано, кои се намалија за 18 проценти. Причината е најавената обемна реорганизација на работењето на компанијата, која ќе чини приближно 26 милијарди долари и е дел од стратегијата за премин кон електрични и хибридни возила.

Спротивно на тоа, акциите на данскиот производител на ветерни фарми на отворено море Орстед пораснаа за 4,1 процент, поради објавените финансиски резултати за четвртиот квартал кои покажуваат зголемување на приходите за 9,8 проценти во споредба со истиот период минатата година.

Во текот на денешното тргување, индексот DAX на Франкфуртската берза падна за 0,08 проценти на 24.439,17 поени. Францускиот CAC 40 се намали за 0,66 проценти на 8.183,83 поени, додека британскиот FTSE 100 бележи пад од 0,36 проценти на 10.276,75 поени. Московскиот индекс MOEX се движеше близу на 2.735,02 поени, со минимален пад од 0,09 проценти.

Во секторот на енергијата, европските фјучерси за гас за март на TTF беа продадени по цена од 34,1 евра за мегават-час на отворањето на берзата. Цената на суровата нафта се намали на 64,047 долари, а нафтата тип Брент се движеше околу 68,324 долари.

Металите за инвеститорите продолжуваат да бидат атрактивни: цената на златото се искачи на 4.860,53 долари за тројанска унца, додека цената на пченицата падна на 5,3273 долари за бушел, што е еднакво на околу 27,2 килограми.

На девизниот пазар, вредноста на еврото во однос на доларот се зголеми за 0,1 процент и достигна 1,17898 долари на Форекс пазарот, што ја одразува стабилноста на европската валута во услови на глобална финансиска неизвесност, пренесува Танјуг.