Сè подоцна во пензија? Новите европски бројки откриваат каде се работи најдолго

Работниот век на Европејците продолжува да се продолжува, покажуваат најновите податоци на Евростат за 2025 година. Речиси во сите земји од Европската Унија граѓаните остануваат активни на пазарот на трудот подолго отколку пред една деценија, а зад овој тренд стојат пензиските реформи, подолгиот животен век и промените на пазарот на трудот.

Според статистиката, просечниот очекуван работен век во Европската Унија достигнал 37,5 години во 2025 година, во споредба со 37,2 години една година претходно. Од 2016 година наваму, овој показател е зголемен за 2,3 години, кога европскиот просек изнесувал 35,2 години.

Очекуваниот работен век не ја означува возраста за пензионирање, ниту значи дека сите граѓани работат ист број години. Станува збор за статистички индикатор кој покажува колку години едно лице во просек останува дел од пазарот на трудот во текот на животот, без разлика дали е во работен однос или привремено е невработено. Пресметките се темелат на актуелните стапки на вработеност и очекуваниот животен век.

На врвот на европската листа се наоѓа Холандија, каде просечниот очекуван работен век достигнува 44 години. Следуваат Шведска со 43,4 години и Данска со 42,6 години. Високо рангирани се и Естонија, Ирска, Германија и Финска, каде што работниот век е значително над европскиот просек.

Од друга страна, најкраток очекуван работен век имаат Романија со 32,7 години, Италија со 33 години и Бугарија со 34,6 години. Под европскиот просек остануваат и Грција со 35,3 години, како и уште неколку јужноевропски држави.

Кај поголемиот дел од земјите членки се забележуваат и разлики меѓу мажите и жените. Во просек, мажите остануваат подолго активни на пазарот на трудот, додека жените почесто имаат прекини во кариерата поради семејни обврски или имаат пониски стапки на вработеност. Најизразени разлики се забележуваат во дел од јужна Европа, каде жените имаат значително пократок работен век во споредба со мажите.

Во Грција, на пример, мажите во просек имаат работен век од 38,5 години, додека кај жените тој изнесува 31,8 години, што е втор најнизок резултат во Европската Унија. Овие бројки укажуваат дека и понатаму постојат предизвици во поглед на рамноправното учество на жените на пазарот на трудот.

Во последните години повеќето европски држави спроведоа пензиски реформи со кои постепено се зголемува возраста за пензионирање, а во дел од нив беа ограничени и можностите за предвремено пензионирање. Истовремено, стареењето на населението и недостигот од работна сила ги поттикнуваат владите да создаваат услови граѓаните да останат подолго економски активни.

Економистите оценуваат дека продолжувањето на работниот век ќе остане еден од најважните трендови во Европа и во наредните години, бидејќи повеќето земји се соочуваат со демографски промени, растечки трошоци за пензискиот систем и потреба од одржување на економскиот раст преку поголемо учество на населението на пазарот на трудот.