Стартап со компактен електричен пикап доби инвестиција од луѓето што ја создадоа Tesla

Двајцата основачи на Tesla, Марк Тарпенинг и Мартин Еберхард, повторно се во центарот на вниманието во автомобилската индустрија, но овојпат како инвеститори во нова компанија што сака да понуди поинаков пристап кон електричните пикапи. Наместо масивни и футуристички возила како Cybertruck, нивниот избор падна на стартапот TELO, кој развива компактен електричен пикап наменет за урбана употреба.

Компанијата TELO, со седиште во Сан Карлос, Калифорнија, планира да го лансира моделот MT1, електричен пикап чија големина е споредлива со MINI Cooper, но со практичност и товарен простор карактеристични за значително поголеми возила. Почетната цена на моделот е околу 41.520 долари, а компанијата верува дека токму компактните димензии и функционалноста ќе бидат нејзината најголема предност на пазарот.

Извршниот директор и коосновач на TELO, Џејсон Маркс, истакнува дека компанијата нема намера веднаш да започне масовно производство. Планот е во првата фаза да се произведат околу 500 возила, а по една година производството постепено да се зголеми на околу 5.000 единици годишно. Според него, ваквиот пристап е инспириран од раната стратегија на Tesla, која прво произведуваше ограничени серии пред да премине на големо производство.

За разлика од многу нови производители на електрични автомобили, TELO не инвестира во изградба на сопствена фабрика. Каросеријата ќе ја произведува надворешен партнер од Мичиген, додека финалното склопување и интеграцијата на батерискиот систем ќе се вршат во Калифорнија. Овој модел на работа значително ги намалува почетните трошоци и овозможува побрзо пласирање на возилото на пазарот.

Досега компанијата обезбедила околу 27 милиони долари инвестиции, вклучувајќи и финансирање од фондот на Марк Тарпенинг, како и поддршка од Мартин Еберхард, кој беше првиот извршен директор на Tesla. И двајцата веруваат дека американскиот пазар е подготвен за нови брендови кои ќе понудат поинакви концепти и ќе се насочат кон специфични сегменти наместо директно да им конкурираат на најголемите производители.

Според нив, денес повеќе не е потребно да се докажува дека електричните автомобили можат да бидат брзи, практични и сигурни. Наместо тоа, иднината ја гледаат во производители кои ќе развиваат иновативни модели за конкретни потреби на купувачите.

Планирано е првите примероци на MT1 да бидат испорачани кон крајот на оваа година или на почетокот на 2027 година. Купувачите ќе можат да избираат меѓу неколку верзии, при што основниот модел ќе нуди автономија од околу 420 километри, додека верзијата со поголема батерија ќе може да помине приближно 560 километри со едно полнење. Ќе биде достапна и изведба со два електромотори, наменета за подобри перформанси.

Компанијата најавува дека краш-тестовите ќе бидат изведени до крајот на годината, а инженерите очекуваат моделот да постигне високи безбедносни оценки благодарение на новата конструкција на шасијата и распоредот на батериите.

Воедно, Тарпенинг и Еберхард не ја кријат својата критика кон актуелната насока во која се движи Tesla. Иако признаваат дека компанијата одигра клучна улога во развојот на пазарот на електрични автомобили, тие сметаат дека денес поголем акцент става на роботакси, роботика и вештачка интелигенција, наместо на развојот на нови модели за поширокиот круг потрошувачи.

Особено критички се осврнуваат на Cybertruck, оценувајќи дека неговиот дизајн и концепт не се во согласност со потребите на поголемиот дел од купувачите. Наместо тоа, тие веруваат дека иднината може да им припадне на покомпактни, практични и подостапни електрични пикапи, каков што се обидува да понуди TELO.