Тивката кинеска револуција во чиповите: Две компании ја менуваат играта и им задаваат удар на големите производители

Кинеските производители на мемориски чипови CXMT и YMTC за само неколку години се трансформираа од компании зависни од државна поддршка во едни од највлијателните играчи на глобалниот полупроводнички пазар. Поттикнати од експлозивната побарувачка за мемориски чипови поради развојот на вештачката интелигенција, двете компании денес не само што бележат рекордни приходи, туку имаат и доволно пазарна моќ самите да ги диктираат цените и да ги избираат своите клиенти.

Растот на побарувачката за меморија, која е клучна за работа на серверите, центрите за податоци и системите со вештачка интелигенција, целосно ја промени позицијата на кинеските производители. Пазар кој некогаш се сметаше за нископрофитабилен денес е еден од најбараните сегменти во технолошката индустрија, а CXMT и YMTC се меѓу најголемите добитници на оваа промена.

CXMT веќе се позиционираше како четврти најголем производител на DRAM меморија во светот, која се користи во паметни телефони, компјутери и сервери. Според информации од извори запознаени со работењето на компанијата, таа во последните месеци значително ги зголемила цените, дури и кон домашните технолошки гиганти. Во еден момент дошло и до несогласувања со Huawei околу цените на мемориските чипови, што дополнително покажува колку е зајакната преговарачката позиција на производителот.

Истовремено, компанијата склучува рекордни договори со најголемите кинески технолошки фирми. Меѓу нив е и повеќегодишен договор со ByteDance, сопственикот на TikTok, чија вредност надминува седум милијарди долари. Претходно беше договорена и соработка со Tencent вредна повеќе од три милијарди долари, што дополнително ја зацврстува позицијата на CXMT како клучен снабдувач за кинеската технолошка индустрија.

Паралелно со тоа, компанијата забрзано го проширува производството. Во тек е изградба на нови фабрики во Шангај и Хефеи, а се разгледуваат и дополнителни инвестиции на други локации. Планот е производствениот капацитет во следните години повеќе од двојно да се зголеми, што би ѝ овозможило на компанијата да стане еден од најголемите светски производители на мемориски чипови.

И YMTC бележи силен раст. Компанијата, специјализирана за NAND флеш меморија, постепено се пробива и на странските пазари. Во последниот период започна продажба и во Јужна Кореја, каде се обидува да искористи дел од пазарот што традиционално го контролираат Samsung и SK Hynix.

Сепак, експанзијата на кинеските производители не поминува без геополитички предизвици. Вашингтон со години воведува ограничувања за пристапот на кинеските компании до најсовремената технологија за производство на чипови. YMTC веќе се наоѓа на американската листа со ограничувања, додека за CXMT сè уште се водат дебати дали треба да биде опфатена со слични мерки.

Најголем предизвик останува пристапот до најнапредните литографски машини. Кинеските компании и натаму зависат од постарите технологии, додека нивните конкуренти Samsung, SK Hynix и Micron користат најсовремени системи за производство на мемориски чипови. Поради извозните ограничувања, Кина нема пристап до најновата генерација литографска опрема, што го забавува развојот на најнапредните производи.

И покрај тоа, кинеските производители успеваат да ја намалат зависноста од странска технологија. YMTC веќе замени значителен дел од својата производствена опрема со домашни решенија и развива сопствени производствени методи, додека CXMT продолжува агресивно да инвестира во нови капацитети.

Дополнителна промена на пазарот е тоа што кинеските мемориски чипови повеќе не се најевтина алтернатива. Поради ограничената понуда и огромната побарувачка, CXMT во одредени случаи веќе продава мемориски модули по повисоки цени од конкурентските производи на Samsung. Ова претставува драматичен пресврт во индустријата, бидејќи кинеските компании долго време беа препознатливи токму по пониските цени.

Со силната државна поддршка, новите фабрики и огромната домашна побарувачка, CXMT и YMTC сè повеќе се наметнуваат како сериозни глобални конкуренти. Иако технолошки сè уште заостануваат зад водечките светски производители во најнапредните сегменти, нивниот брз развој покажува дека Кина успешно ја гради сопствената индустрија за мемориски чипови и постепено го менува балансот на силите на светскиот пазар на полупроводници.