Акциите на SpaceX добиваат нов поттик: Компанијата стана дел од престижниот индекс Nasdaq 100

Компанијата SpaceX“, предводена од Илон Маск, од денеска официјално станува дел од индексот Nasdaq 100, само две недели по своето берзанско деби. Станува збор за едно од најбрзите вклучувања на новолистирана компанија во овој престижен индекс, што дополнително го потврдува огромниот интерес на инвеститорите за компанијата и нејзиниот потенцијал.

Аналитичарите проценуваат дека приклучувањето кон Nasdaq 100 ќе донесе милијарди долари нови инвестиции преку индексните фондови и берзански тргуваните фондови (ETF), кои автоматски ќе мора да ги вклучат акциите на „СпејсИкс“ во своите портфолија за да ја следат структурата на индексот. Според проценките на „Џеј Пи Морган“, само преку пасивните инвестициски фондови би можеле да се слеат околу 4,3 милијарди долари во акциите на компанијата.

„СпејсИкс“ дебитираше на берзата на 12 јуни, а благодарение на изменетите правила на Nasdaq за новолистирани компании, успеа за рекордно краток период да стане дел од еден од најследените технолошки индекси во светот. Компанијата моментално има пазарна вредност поголема од 2,1 трилион долари, што ја позиционира меѓу највредните американски корпорации.

Паралелно со вклучувањето во индексот, заврши и таканаречениот „тивок период“, по што водечките инвестициски банки ги објавија своите први официјални анализи за компанијата. Повеќето од нив започнаа со позитивни препораки за инвеститорите, оценувајќи дека „СпејсИкс“ располага со значителен потенцијал за понатамошен раст.

„Морган Стенли“ ја опиша компанијата како „последната граница на вештачката интелигенција“, додека аналитичарите на „Голдман Сакс“ сметаат дека „СпејсИкс“ има можност да ја прошири својата предност во неколку клучни области, меѓу кои вселенската технологија, сателитските комуникации и развојот на системи базирани на вештачка интелигенција.

Оптимистички оценки објавија и други големи финансиски институции, кои посебно го истакнуваат потенцијалот на ракетата „Старшип“, проект што треба да овозможи целосно повеќекратна употреба на вселенските летала и значително да ги намали трошоците за комерцијални мисии во вселената. Воедно, големи очекувања постојат и од натамошното ширење на сателитската интернет-мрежа „Старлинк“, која веќе има значајна улога на глобалниот пазар.

Сепак, не сите аналитичари ја делат оваа оптимистичка перспектива. Дел од нив предупредуваат дека сегашната пазарна вредност на компанијата во голема мера се темели на идни проекти кои сè уште не се целосно реализирани. Според овие оценки, успехот на „Старшип“, како и развојот на решенијата за вештачка интелигенција, ќе бидат клучни фактори што ќе ја оправдаат високата пазарна капитализација во наредните години.

И покрај различните проценки, интересот на инвеститорите останува силен. Од излегувањето на берзата до денес, акциите на „СпејсИкс“ бележат раст од повеќе од шест проценти, иако нивното тргување беше проследено со очекувана нестабилност. Со вклучувањето во Nasdaq 100, компанијата добива дополнителна поддршка од институционалните инвеститори, што би можело да придонесе за уште поголема ликвидност и засилено присуство на глобалните финансиски пазари.