Од iPhone до Vision Pro: Apple ја проширува вештачката интелигенција низ целиот екосистем

На годишната конференција Worldwide Developers Conference, Apple претстави нова стратегија за вештачка интелигенција која има за цел да донесе поконкретни и практични подобрувања за секојдневните корисници. Настанот во Купертино траеше околу еден час и дваесет минути, што е релативно кратко за стандардите на компанијата, но беше исполнет со низа најави за иднината на iPhone, Mac, iPad и другите уреди.

Во фокусот на презентацијата беше новата генерација на дигиталниот асистент Siri, целосно редизајниран со вештачка интелигенција. Новата верзија, наречена Siri AI, овозможува поприродна комуникација и поддржува континуирани разговори. Асистентот сега има и посебна апликација, интегриран е во Dynamic Island интерфејсот на iPhone, а ќе биде достапен и на Mac, iPad, Apple Watch и Vision Pro. „Епл“ најави дека системот ќе може да користи информации од интернет, е-пошта, фотографии и други извори на уредот за да дава поконтекстуални одговори и предлози.

Компанијата воведува и нови функции како помош при пишување пораки и е-пошта, уредување текстови и подобрена граматичка проверка. Siri ќе може да препознава што се случува на екранот и да помага со конкретни задачи, како предлагање одговори или додавање информации во апликации. На Mac, асистентот се интегрира со Spotlight пребарувањето, додека на Vision Pro се воведува и просторна верзија на Siri која може да се појавува во виртуелниот простор на корисникот.

Новите можности ќе бидат воведувани постепено, првично на англиски јазик и на поновите уреди, при што за користење ќе биде потребен хардвер што поддржува Apple Intelligence, што ги исклучува постарите модели.

Покрај Siri, „Епл“ претстави и низа подобрувања поврзани со Apple Intelligence низ целиот екосистем. Пораките, поштата и календарот добиваат поинтелигентни предлози и можност за автоматско организирање содржина. Пребарувањето во Safari, Photos и Mail е редизајнирано за побрзи и попрецизни резултати, додека табовите во Safari автоматски ќе се групираат според содржина. Воведени се и алатки кои можат да следат промени на веб-страници и автоматски да создаваат екстензии врз основа на опис од корисникот.

Значајни измени добиваат и оперативните системи. Апликациите ќе се отвораат побрзо, фотографиите ќе се обработуваат речиси веднаш, а целокупниот систем е оптимизиран и за постари уреди. „Епл“ ја подобрува и визуелната страна на интерфејсот со нови опции за прилагодување на дизајнот Liquid Glass, кој добива појасна читливост и дополнителни нивоа на транспарентност.

Фотографијата и уредувањето слики добиваат нови алатки базирани на вештачка интелигенција, кои овозможуваат попрецизно чистење на објекти, проширување на кадри и промена на перспектива. Камерата ќе биде интегрирана со Siri, овозможувајќи информации во реално време и автоматски активности, како делење сметки или анализа на оброци.

Промени има и во поврзаноста, каде што преносот на податоци преку AirDrop ќе биде значително побрз, а уредите ќе можат полесно да преминуваат меѓу Wi-Fi и мобилни мрежи. Во здравствените функции се воведуваат нови можности за следење на состојби кај корисниците, како и подобрена едукација за здравствени промени.

Посебно внимание е посветено и на безбедноста и родителските контроли, со поголема контрола врз содржините, апликациите и комуникациите на децата. „Епл“ исто така ги проширува функциите за заштита од чувствителна содржина во видеоповици и фотографии.

Дополнително, Apple Watch и AirPods добиваат нови функции, вклучувајќи подобрен звук, побрзи интеракции и нови гестови за користење. Дел од постарите уреди, особено Mac компјутерите со Intel процесори, повеќе нема да бидат поддржани со новиот систем.

Со оваа презентација, „Епл“ јасно покажува дека идниот развој го насочува кон длабока интеграција на вештачката интелигенција во сите свои уреди, со цел да понуди поинтуитивно, побрзо и поинтелигентно корисничко искуство, без притоа да се потпира на радикални хардверски промени.