Производството на нафта на ОПЕК на најниско ниво во повеќе од две децении поради геополитички тензии

Производството на нафта во рамки на Организацијата на земјите извознички на нафта (ОПЕК) во мај се спуштило на најниско ниво во повеќе од две децении, покажува нова анкета на Ројтерс. Падот е резултат на нагло намалување на извозот од Иран, како и нарушувања во снабдувањето од други земји од Заливот, предизвикани од затегнатата безбедносна и воена ситуација во регионот.

Според податоците, вкупното производство на 11-члената организација се намалило за 1,06 милиони барели дневно во однос на претходниот месец и изнесувало околу 16,13 милиони барели дневно. Тоа е најниско месечно ниво регистрирано од најмалку 2000 година, и значително под нивото забележано за време на пандемијата во 2020 година, кога побарувачката за нафта драматично се намали.

Во извештајот се посочува дека податоците не го вклучуваат Обединетите Арапски Емирати, кои ја напуштија ОПЕК на 1 мај. Најголем пад е забележан кај Иран, каде што извозот на сурова нафта и кондензат се намалил на најниско ниво во последните најмалку шест години. Причината, според анкетата, е силното влијание на американските мерки и блокадата што започнала во април, која сериозно ги ограничила иранските испораки.

Дополнителен фактор за нарушувањата е и влошената безбедносна ситуација околу Ормутскиот теснец, клучна рута преку која поминува значаен дел од светската трговија со нафта. Ограничувањата во движењето низ оваа стратешка точка довеле до намалување на извозот и кај некои други земји од Персискиот Залив.

И Саудиска Арабија бележи пад на производството, додека Ирак успеал делумно да го зголеми производството благодарение на зголемената домашна потрошувачка. Венецуела и Нигерија, според анкетата, забележале умерено зголемување на испораките.

Иако осум членки на пошироката група ОПЕК+ претходно се договориле за зголемување на производството во мај, ескалацијата на конфликтите и ограничувањата во поморските рути практично го оневозможиле спроведувањето на тие планови.

Податоците во анкетата се базирани на следење на тековите преку финансиски податоци, компании за следење на испораки, како и информации од извори во нафтените компании и индустриски консултанти, што укажува на широко распространето нарушување на глобалниот енергетски пазар.