Dreambeans користи податоци од Gmail, Calendar и YouTube за да креира персонализирани „приказни“ за корисниците

Google Labs претстави нова апликација базирана на вештачка интелигенција, наречена Dreambeans, која има за цел да им понуди на корисниците персонализирани идеи и инспирација за секојдневниот живот. Апликацијата е достапна за iOS и Android уреди и претставува уште еден обид на технолошкиот гигант да ја прошири употребата на AI во насока на лична продуктивност и животен стил.

Dreambeans функционира така што, со дозвола од корисникот, собира и анализира податоци од различни Google сервиси, вклучувајќи Gmail, Calendar, Photos, YouTube и историјата на пребарување. Врз основа на овие информации, апликацијата генерира ограничен број дневни „приказни“, кои претставуваат предлози за активности, теми за истражување или настани што би можеле да бидат релевантни за корисникот.

Овие предлози може да вклучуваат препораки за нови локации, идеи за хобија или активности, како и информации поврзани со претстојни настани од личниот календар. На пример, ако корисникот има внесено настан поврзан со набавка на домашно милениче, апликацијата може да понуди содржини и совети поврзани со грижата за ново куче. Во други случаи, Dreambeans може да прикаже селектирани вести или видеа што се совпаѓаат со претходните интереси на корисникот.

Една од клучните карактеристики на апликацијата е нејзиниот ограничен дневен формат. Наместо бескрајно прелистување, корисниците добиваат меѓу 10 и 14 внимателно избрани содржини дневно, со цел да се намали зависноста од постојано користење на мобилни уреди и да се поттикне реална активност надвор од дигиталниот простор.

Од Google посочуваат дека приватноста е значаен аспект на оваа услуга. Корисниците имаат целосна контрола врз тоа кои податоци ќе ги споделат со апликацијата, а исто така можат во секое време да ги избришат своите информации. Пристап до генерираните содржини има исклучиво самиот корисник.

Името Dreambeans, според креаторите, произлегува од начинот на функционирање на системот. Додека корисникот спие, апликацијата ги обработува податоците од поврзаните сервиси, а наутро нуди концентриран сет на идеи и предлози, споредено со утринско кафе кое ја започнува денот.

Во моментов, Dreambeans е достапна само за одредени корисници во САД кои користат Google AI Ultra претплата, додека за останатите постои листа на чекање. Со оваа апликација, Google продолжува да експериментира со нови начини на интеграција на вештачката интелигенција во секојдневниот живот, со фокус на персонализација и корисничко искуство.