Airbus тестира авион што може да лета 22 часа без прекин и да поврзува далечни континенти

Airbus направи значаен чекор во развојот на ултрадолги летови, откако успешно го тестираше својот нов патнички авион A350-1000ULR, способен да лета до 22 часа без прекин. Овој модел претставува надградена верзија на веќе познатата серија A350, прилагодена за екстремно долги релации.

Според информациите од компанијата, првиот тест лет бил извршен од нивниот производствен центар во Тулуз, Франција. Авионот летал нешто помалку од четири часа, достигнувајќи висина од над 12.500 метри, при што бил опремен со специјализирана опрема за следење на перформансите во текот на летот.

Клучната разлика кај оваа варијанта е дополнителниот резервоар за гориво, кој овозможува значително зголемен дострел. Со тоа, авионот може да покрие околу 18.500 километри, што го прави еден од најдолгопловните комерцијални авиони досега.

Овој модел е развиен со јасна намена, а тоа е овозможување директни летови на многу долги релации без потреба од слетување. Австралиската авиокомпанија Qantas веќе има нарачано 12 вакви авиони, со план да воспостави директна линија меѓу Сиднеј и Лондон, што би било еден од најдолгите комерцијални летови во светот.

Испораката на првиот авион се очекува во 2027 година, по завршувањето на сите тестирања и сертификациски процедури. Иако првичните планови беа ваквите летови да започнат порано, проектот се соочи со одредени одложувања.

Во моментов, рекордот за најдолг редовен патнички лет го држи линијата меѓу Сингапур и Њујорк, која трае повеќе од 18 часа. Новиот авион на Airbus има потенцијал значително да го надмине овој лимит и да отвори нова ера во интерконтиненталниот воздушен сообраќај.

Со овој проект, Airbus ја засилува конкуренцијата во сегментот на долголиниски летови и одговара на зголемената побарувачка за директни врски меѓу оддалечени глобални дестинации, што може да го промени начинот на кој патниците патуваат на долги релации.