Кавасаки и Нвидија влегуваат во трка за AI роботи, акциите експлодираа

Јапонската компанија Кавасаки Хеви Индастрис влегува во нова фаза од развојот на роботиката и вештачката интелигенција преку соработка со американскиот технолошки гигант Нвидија и уште неколку водечки компании од секторот. Веста предизвика силна реакција на берзата, па акциите на Кавасаки скокнаа за дури 12 проценти, што претставува најголем дневен раст од февруари наваму.

Компанијата соопшти дека ќе работи заедно со Нвидија, Мајкрософт, Аналог Девајсис и јапонскиот Фуџицу на развој на технологии поврзани со таканаречената „физичка вештачка интелигенција“, односно системи кои комбинираат AI со роботи и машини што можат да функционираат во реална средина. Заедничкиот развоен центар ќе биде сместен во Сан Хозе, Калифорнија.

Фокусот на проектот првично ќе биде насочен кон здравството, грижата за стари лица и мобилноста, области во кои Јапонија гледа голем потенцијал поради стареењето на населението и недостигот од работна сила. Кавасаки ќе го развива и својот четириножен робот CORLEO, кој е замислен како персонално средство за мобилност и поддршка.

Инвеститорите позитивно ја примија најавата, оценувајќи дека партнерството со Нвидија може значително да го забрза развојот на AI роботиката во компанијата. Аналитичарите од Morgan Stanley MUFG посочуваат дека Кавасаки веќе планира значително зголемување на инвестициите во технологии поврзани со роботика и вештачка интелигенција во текот на фискалната 2027 година.

Позитивниот ефект не се почувствува само кај Кавасаки. Акциите на други јапонски компании од секторот за роботика исто така пораснаа, при што Фанук забележа раст од околу осум проценти, а Јаскава Електрик речиси шест проценти.

Во последните месеци роботиката станува една од најатрактивните теми на азиските пазари, особено поради засилените партнерства меѓу производителите на чипови и индустриските компании. Неодамна и Фанук најави соработка со Гугл за развој на AI решенија во роботиката, што дополнително ги зголеми очекувањата дека следниот голем технолошки бран ќе биде токму во физичката примена на вештачката интелигенција.