Европа сè повеќе зависи од Кина: Аналитичарите предупредуваат на нов економски ризик

Европската индустрија сè повеќе зависи од кинеските компоненти и суровини, а аналитичарите предупредуваат дека континентот се соочува со нова форма на економска зависност која може сериозно да ја ослабне домашната продукција. Иако Европската Унија во последните години воведе царини и нови правила за ограничување на кинеското влијание, компаниите низ Европа продолжуваат масовно да користат евтини производи и индустриски делови од Кина.

Според економските експерти, проблемот денес не е само увозот на готови кинески производи, туку сè поголемата зависност од компоненти без кои многу европски фабрики не можат да функционираат. Од машинската индустрија до хемискиот сектор, европските производители сè почесто се потпираат на кинески материјали бидејќи тие се значително поевтини од локалните алтернативи.

Во Брисел расте загриженоста дека Европа може да се соочи со нов „кинески шок“, сличен на оној што пред две децении ја погоди американската индустрија по наглиот продор на евтините кинески производи на светскиот пазар. Аналитичарите предупредуваат дека комбинацијата од државни субвенции во Кина и ниската вредност на јуанот создава услови со кои европските компании тешко можат да се натпреваруваат.

Индустриските здруженија посочуваат дека многу фирми практично немаат избор. Доколку кинеските производи нудат речиси ист квалитет, а чинат значително помалку, производителите се принудени да ги изберат за да останат конкурентни. Тоа постепено доведува до намалување на европското производство и губење работни места во повеќе индустриски сектори.

Последиците веќе се чувствуваат во германската индустрија, каде што машинскиот сектор бележи пад на вработеноста. Во исто време, трговскиот дефицит меѓу Европската Унија и Кина продолжува да расте, а експертите предупредуваат дека зависноста од кинески суровини и хемикалии станува стратешки ризик за Европа.

Особено загрижувачки е фактот што Кина доминира во снабдувањето со одредени индустриски материјали кои се клучни за производството на пластика, козметика, бои и други производи. Анализите покажуваат дека европскиот пазар кај некои категории речиси целосно зависи од кинески увоз.

Поради тоа, Европската комисија размислува за нови мерки со кои би се намалила зависноста од еден снабдувач. Меѓу опциите е и воведување правила според кои компаниите ќе мора да обезбедат повеќе различни извори за клучните компоненти и суровини.

Дел од аналитичарите сметаат дека досегашните европски мерки не дале значајни резултати, бидејќи ценовната предност на кинеските производи останува преголема. Според нив, Европа влегува во нова фаза на економски предизвик во која ќе мора внимателно да балансира меѓу заштитата на сопствената индустрија и потребата од евтини производствени ресурси.