OpenAI ја засилува сајбер одбраната на Европа со нова AI програма

Американската компанија OpenAI објави дека ќе им овозможи пристап до своите најнови модели за вештачка интелигенција, меѓу кои и GPT-5.5-Cyber, на низа европски компании со цел да ја зајакнат заштитата од сајбер закани и безбедносни пропусти. Меѓу фирмите кои ќе бидат вклучени во програмата се Deutsche Telekom, BBVA, Telefonica, Sophos и германската финансиска компанија Scalable Capital.

Новата иницијатива, наречена „Trusted Access for Cyber“, е наменета за проверени компании од клучни сектори како финансии, телекомуникации, енергетика и јавни услуги. Преку неа, организациите ќе добијат пристап до напредни AI алатки со вградени безбедносни механизми кои се дизајнирани исклучиво за одбранбени и заштитни активности во сајбер просторот.

Од OpenAI велат дека целта е да се воспостави рамнотежа помеѓу корисноста на технологијата и контролата на потенцијално опасните активности. Генералниот директор за Европа, Блискиот Исток и Африка, Emmanuel Marill, изјави дека со развојот на сè помоќни AI модели расте и потребата за строги безбедносни ограничувања, но истовремено и за обезбедување алатки што ќе им помогнат на компаниите побрзо да откриваат и спречуваат закани.

Притисокот врз технолошките компании дополнително се зголеми по неодамнешното претставување на моделот „Mythos“ од конкурентската компанија Anthropic. Според експертите, новите генерации AI системи имаат способност да пишуваат и анализираат код на високо ниво, што значително ја зголемува нивната моќ за откривање безбедносни слабости, но и ризикот тие способности да бидат злоупотребени за напади врз банки, компании и критична инфраструктура.

Во меѓувреме, OpenAI ја продлабочува и соработката со европските институции. Европската комисија соопшти дека компанијата понудила отворен пристап до одредени сајбер-безбедносни функционалности, додека од Брисел посочија дека Anthropic засега не покажала исто ниво на транспарентност и соработка.

Поранешниот британски министер за финансии George Osborne, кој го предводи проектот „OpenAI for Countries“, испрати писмо до Европската комисија во кое нагласува дека поширокиот пристап до одбранбени AI алатки може да придонесе за заедничка безбедност и подобра заштита на јавниот интерес во Европа.

Покрај тоа, OpenAI најави формирање нова компанија со почетна инвестиција поголема од четири милијарди долари, чија задача ќе биде развој и имплементација на AI системи за организации ширум светот. Во рамки на стратегијата за проширување, компанијата ќе ја преземе и консултантската фирма Tomoro, со цел побрзо да го зголеми капацитетот на новиот сектор.