Фармацевтската индустрија алармира: бирократијата ја кочи Европа во трката со САД и Кина

Извршниот директор на Roche, Томас Шинејкер, предупреди дека Европа ризикува уште повеќе да заостанува зад САД и Кина во областа на фармацевтските истражувања и иновации поради, како што го опиша, „неверојатно комплицирана“ бирократија и политики кои можат да го загрозат пазарот на труд и развојот на индустријата.

Во разговор за Ројтерс, тој истакна дека Европа веќе губи чекор во повеќе индустрии и дека фармацевтскиот сектор останува една од ретките области во кои сè уште има конкурентска шанса, но само доколку се донесат правилни политички одлуки. Според него, прекумерната регулатива и недоволно флексибилниот пристап кон иновациите ја кочат способноста на европските компании да развиваат и воведуваат нови лекови.

Изјавите доаѓаат во период кога глобалната фармацевтска индустрија се соочува со последици од американската политика за цените на лековите, позната како пристап „најповластена нација“, која има за цел да ги врзе цените во САД со пониските цени во други земји, меѓу кои и европските. Од воведувањето на оваа политика, новите лансирања на лекови во Европа се намалиле за околу една третина, покажуваат анализи на GlobalData.

Претставници на индустријата предупредуваат дека ваквите трендови може да го намалат пристапот на пациентите до нови терапии. Извршниот директор на AstraZeneca, Паскал Сорио, изјави дека Германија ризикува да пропушти нови лекови доколку продолжи со ограничување на трошоците во здравството, додавајќи дека Европа би можела да се сведе само на продажен пазар, наместо центар за иновации.

Европската комисија соопшти дека внимателно ја следи американската ценовна политика, но дека приоритет остануваат пристапот на пациентите и достапноста на терапиите. Од Европската агенција за лекови пак наведуваат дека пристапот до лекови во Европската унија сè уште е на високо ниво.

И покрај критиките, Шинејкер нагласи дека Roche останува посветена на лансирање на своите нови терапии на европскиот пазар и дека компанијата води разговори со повеќе европски влади, меѓу кои Германија, Франција, Италија и Велика Британија, околу цените и стимулансите за иновации. Тој додаде дека побогатите земји треба да го преземат својот „фер дел“ во финансирањето на истражувањата, со цел да се обезбеди понатамошен развој на нови лекови, но и пристапност на терапиите во посиромашните региони.

Од друга страна, од Sanofi исто така порачаа дека ќе продолжат да ги лансираат своите производи во Европа, но дека американските политики би можеле да ги натераат компаниите да го преиспитаат начинот на формирање на цените и да направат одредени прилагодувања. И покрај тоа, компанијата нагласува дека нејзината намера останува секој лек што ќе биде одобрен во САД или други пазари да биде достапен и во Европа.