OnlyFans во преговори за продажба на удел вреден над 3 милијарди долари

Платформата OnlyFans, најпозната по содржини за возрасни, води напредни разговори за продажба на малцински удел на инвестицискиот фонд Architect Capital, во зделка што би ја проценила компанијата на повеќе од три милијарди долари. Според информации од извори запознаени со процесот, договорот би можел да се финализира веќе следниот месец, при што фондот со седиште во Сан Франциско би стекнал помалку од 20 проценти од сопственоста.

Компанијата, која формално работи преку Fenix International Ltd., се наоѓа во период на значајни промени по неодамнешната смрт на сопственикот Leonid Radvinsky. Контролниот пакет акции сега е во рамки на неговиот семеен фонд, што дополнително ја засилува неизвесноста околу идната сопственичка структура.

Планираната инвестиција не се однесува само на капитал, туку и на стратешка соработка. Architect Capital би требало да работи со платформата на развој на нови финансиски услуги и алатки за креаторите, со цел да се прошири понудата и да се зголеми ангажманот на корисниците.

Основана во 2016 година од Guy Stokely и Tim Stokely, платформата брзо се позиционираше како простор за содржини што не се дозволени на традиционалните социјални мрежи. Вистинскиот подем го доживеа откако Рудвински го презеде мнозинскиот удел во 2018 година, трансформирајќи ја во глобален феномен преку модел што им овозможува на креаторите директно да наплатуваат од својата публика. Популарноста дополнително се зголеми за време на пандемијата, кога многу корисници ја користеа како алтернативен извор на приходи.

Иако компанијата веќе подолго време разгледува опции за продажба на дел од бизнисот, процесот се одвива бавно. Главната причина е што, и покрај високите приходи и профитабилноста, нејзината поврзаност со индустријата за возрасни ја ограничува заинтересираноста кај традиционалните инвеститори, кои се внимателни поради репутациски и регулаторни ризици.

Претходно се разгледуваше и продажба на мнозински удел со значително повисока проценка, но актуелната понуда ја рефлектира вредноста на малцински пакет. Според достапните информации, Architect Capital планира да ја финансира трансакцијата преку специјално инвестициско возило со средства од надворешни инвеститори.

OnlyFans останува финансиски силна компанија. Само во 2024 година пријави приходи од околу 1,4 милијарди долари, со повеќе од 4,6 милиони креатори и стотици милиони корисници ширум светот. Платформата задржува околу 20 проценти од заработката од претплати и содржини, што ѝ обезбедува стабилен прилив на средства.

И покрај обидите да привлече поширок спектар на креатори, вклучително и јавни личности и инфлуенсери од други области, OnlyFans и понатаму најмногу се идентификува со содржини за возрасни, што останува клучен фактор во нејзината деловна и инвестициска стратегија.