Нов стратегиски чекор: Kia ќе се бори за дел од профитабилниот пикап сегмент

Kia најави значајно проширување на своето присуство пазарот со планови за воведување на нов пикап модел за потрошувачите во наредните години, како дел од пошироката стратегија за глобален раст. Јужнокорејскиот производител соопшти дека до 2030 година ќе лансира нов пикап, кој ќе вклучува и хибридни верзии, при што најмалку една од нив ќе се произведува во САД.

Со ова, Kia влегува во еден од најконкурентните и најпрофитабилни сегменти на американскиот автомобилски пазар, каде доминираат компании како General Motors, Ford и Stellantis. Според најавите, новиот модел ќе биде со средна големина и со класична „body-on-frame“ конструкција, што го позиционира директно против модели како Toyota Tacoma, Ford Ranger и Chevrolet Colorado.

Компанијата очекува дека до 2034 година ќе достигне годишна продажба од околу 90.000 пикапи во Северна Америка и ќе освои околу 7 проценти од сегментот на средни пикапи. Овој чекор е дел од амбициозната стратегија на Kia за зголемување на вкупниот пазарен удел во САД на 6,2 проценти до 2030 година, во споредба со околу 5 проценти во моментов.

Покрај пикап програмата, Kia ги зголемува и своите глобални амбиции. Компанијата цели на вкупна годишна продажба од над 4 милиони возила до крајот на деценијата, поттикната од проширување на понудата на електрични, хибридни и возила со продолжен домет. Истовремено, производителот ја нагласува важноста на американскиот пазар како клучен двигател на идниот раст, со оглед на неговиот удел во глобалната побарувачка и силната конкуренција во сегментот на лесни камионети и SUV возила.