Договор во најава: ЕУ и САД со план за заеднички пристап кон ретките минерали

Европската Унија и САД се приближуваат кон договор за заедничка координација во областа на критичните минерали, со цел да ја зајакнат сигурноста на синџирите на снабдување и да ја намалат зависноста од доминацијата на Кина, објави Bloomberg News. Според извештајот, потенцијалниот договор би вклучувал мерки како гаранции за минимални цени, што би можело да им даде предност на добавувачи надвор од Кина.

Планот, кој се опишува како акциски документ, предвидува и поширока соработка меѓу Брисел и Вашингтон во однос на заеднички стандарди, инвестиции и развој на заеднички проекти во секторот на критични суровини. Дополнително, двете страни би координирале и реакции во случај на прекини во снабдувањето, особено во ситуации предизвикани од геополитички тензии или ограничувања од големи добавувачи како Кина.

Иако Европската комисија одби да го коментира извештајот, од американската Канцеларија на трговскиот претставник исто така немаше веднаш реакција. Сепак, во март еврокомесарот за трговија Марош Шефчович изјави дека имал „многу позитивна“ средба со американскиот претставник Џејмисон Грир, на која двете страни се согласиле да ја продлабочат соработката во областа на критичните минерали и да разговараат за трговските тарифи.

Според информациите, идниот договор би ги опфатил сите фази од синџирот на вредност кај критичните минерали, вклучувајќи истражување, ископување, преработка, рафинирање, рециклирање и повторна употреба. Целта е да се создаде поотпорен и диверзифициран систем за снабдување со суровини кои се клучни за современата индустрија, особено за енергетската транзиција и производството на високотехнолошка опрема.

САД во последните години интензивно работат на обезбедување пристап до резервите на критични минерали, особено ретки земни елементи, чиј синџир на снабдување е во голема мера контролиран од кинески компании. Овој договор со ЕУ се гледа како дел од поширока стратегија за намалување на таа зависност и зајакнување на западната индустриска безбедност.