Кога дизајнот на работниот простор станува клуч за раст на компанијата

Во светот на современиот дизајн, каде естетиката и функционалноста се испреплетуваат во секој детал, младите и посветени професионалци носат свежа енергија и нови перспективи. Еден од нив е Дејан Панајотов – дизајнер на мебел кој веќе седум години гради препознатлив стил и професионален интегритет во рамките на компанијата Јумис.

Со постојана желба за напредок, Дејан континуирано инвестира во своето знаење, следејќи ги најновите трендови во мебелската индустрија и активно посетувајќи реномирани саеми. Неговата работа не се ограничува само на дизајн, туку се проширува и преку соработка со архитекти, каде се раѓаат креативни решенија што одговараат на современите потреби на просторот и луѓето.

Неговата посветеност и талент се потврдени и со значајни признанија, меѓу кои се издвојува првата награда за целокупно уредување на штанд на Саемот за мебел во Белград – успех што говори за неговата визија, креативност и способност да создава впечатливи и функционални дизајнерски концепти.

Во продолжение, разговараме со Дејан за неговиот професионален пат, инспирацијата зад неговите дела и предизвиците и можностите што ги носи современиот дизајн на мебел.

Колку навистина просторот во кој работиме влијае врз нашата продуктивност и ментална состојба? Дали можеш да ни објасниш од дизајнерска перспектива како канцеларијата може да стане „тивок сојузник“ на успехот во бизнисот?

Просторот во кој работиме и те како влијае врз продуктивноста и менталната состојба. Пред сè, ако нема добар распоред на мебелот и добра организација на елементите, канцеларијата брзо станува неуредна и се создава хаос. Во таква средина, особено кога се работи во брзање, тешко се наоѓа тоа што се бара, што значи губење време и дополнителен стрес. Исто така, неудобниот мебел може да предизвика болки во грбот, вратот или рацете, што директно ја намалува концентрацијата и продуктивноста. Затоа ергономијата е многу важен фактор при уредување на работниот простор.

Постојат и истражувања кои покажуваат дека реновирањето на канцеларијата со добро испланиран мебел и функционален распоред може да ја зголеми продуктивноста и до 20–25%. Сите овие факти сами по себе покажуваат дека работниот простор може да биде „тивок сојузник“ за успешен бизнис.

Кога започнуваш со уредување на канцелариски простор, што е првото нешто што го анализираш – енергијата на просторот, функционалноста, бренд идентитетот или луѓето што ќе работат во него? Како ги поврзуваш сите овие елементи во една хармонична целина?

Најпрво го анализирам просторот на лице место: колку вработени ќе работат во него, дали работат индивидуално или тимски и колку комуницираат меѓусебно. Овие информации се многу важни за да се одреди распоредот на работните позиции и зоните во просторот.

Исто така ја анализирам и енергијата на самиот простор – како влегува природната светлина, како се движат луѓето низ просторот и какво чувство остава просторот на прв поглед. Сето тоа помага да се создаде средина во која луѓето ќе се чувствуваат пријатно, ќе можат полесно да се концентрираат и поефикасно да работат.

Често се зборува за „позитивни вибрации“ во просторот. Од практично искуство, кои конкретни елементи (светлина, бои, материјали, распоред) најмногу придонесуваат за создавање позитивна и мотивирачка работна атмосфера?

Кога се зборува за „позитивни вибрации“ во просторот, всушност се мисли на добро избалансирана средина што позитивно влијае врз расположението и продуктивноста на луѓето. Најголемо влијание има светлината, особено природната, бидејќи го подобрува расположението и ја намалува замореноста. Боите исто така играат важна улога – неутралните и природни тонови создаваат мирна атмосфера, додека акцентните бои можат да внесат енергија и креативност.

Материјалите, особено природните како дрво и текстил, внесуваат топлина во просторот, а добриот распоред на мебелот овозможува полесно движење, подобра организација и поефикасна комуникација во тимот. Кога сите овие елементи се добро усогласени, се создава пријатна и мотивирачка работна атмосфера.

Дали постои разлика во пристапот кога уредуваш канцеларија за стартап компанија во споредба со веќе изграден и стабилен бизнис? Како дизајнот може да ја рефлектира визијата и амбицијата на една компанија?

Нормално дека постои разлика. Кај стартап компаниите најчесто се проектираат помали канцеларии со ограничен буџет. Интересното е што токму со тие ограничени средства треба да се создаде нешто специфично и креативно – простор кој ќе биде препознатлив и ќе остава впечаток кај клиентите. Целта е преку дизајнот и мебелот да се прикаже карактерот на компанијата, нејзината енергија и амбиција, дури и кога буџетот е помал.

Кај поголемите и веќе стабилни компании ситуацијата е поинаква. Таму обично има поголем буџет, а често постои и веќе дефиниран корпоративен стил кој ја карактеризира самата компанија. Во таков случај, задачата е просторот да се уреди во согласност со тој идентитет, за канцеларијата визуелно и функционално да го одразува брендот, професионалноста и стабилноста на компанијата.

Кои се најчестите грешки што ги прават сопствениците при уредување на канцеларија, а кои несвесно ја намалуваат продуктивноста или создаваат стресна атмосфера?

Една од најчестите грешки е уредување на канцеларијата без претходно изработен проект, што често доведува до лош распоред и нефункционален простор. Друга грешка е користење на несоодветни материјали, избрани само според цена или изглед, без да се размисли за нивната издржливост и практичност.

Често се избегнува и доработка на електричните инсталации, што подоцна создава проблеми со приклучоци и кабли и го прави просторот неуреден. Исто така, изработката на посложен мебел понекогаш се доверува на непрофесионалци, што може да доведе до лош квалитет и дополнителни трошоци.

Колку е важен балансот помеѓу естетиката и функционалноста? Дали убавиот простор е доволен сам по себе, или вистинскиот успех доаѓа од паметно планирана организација и ергономија?

Да бидам искрен, едното без другото не оди. Естетиката и функционалноста мора да одат заедно, бидејќи убавиот простор сам по себе не е доволен ако не е практичен и удобен за работа. Клучот е во паметното планирање на организацијата и ергономијата. Кога просторот е добро осмислен, дури и помал простор може да биде компактен, функционален и пријатен за работа.

Можеш ли да споделиш конкретен пример од твојата пракса каде редизајнот на канцелариски простор донел видлива промена – во мотивацијата на тимот, во имиџот на компанијата или дури во деловните резултати?

Ќе споделам еден пример од пракса. Работев на дизајн на канцелариски простор за една компанија со седиште во Штип, која се пресели во нов објект. Во тој период компанијата имаше околу 20–30 вработени, но просторот беше планиран со можност за значително проширување.

По неколку месеци од монтажата и користењето на новите канцеларии, сопственикот повторно се јави со барање да се изработат уште толку нови работни места. Како што ми објасни, интересот за работа во таа компанија значително се зголемил, бидејќи луѓето сакале да работат во таков модерен и пријатен простор. Канцеларијата беше добро осветлена, функционално организирана и имаше катчиња за релаксација и неформални состаноци. Таквиот амбиент не само што ја подобри мотивацијата на тимот, туку и позитивно влијаеше на имиџот на компанијата и привлекувањето нови кадри.