Picsart се позиционира како понапредна алтернатива на Canva за социјални медиуми
Платформата за дизајн со вештачка интелигенција Picsart го лансира својот пазар за AI агенти, овозможувајќи на креаторите да „ангажираат“ дигитални асистенти за специфични задачи како прилагодување и ремиксирање на содржини за социјалните мрежи или уредување на фотографии за производи на Shopify. Со повеќе од 130 милиони корисници ширум светот, претежно од генерацијата Z, Picsart се позиционира како понапредна верзија на Canva за менаџерите на социјални медиуми и креаторите на дигитални содржини. Компанијата стана „јуникон“ во 2021 година во време на експанзија на економијата на креатори, а останува релевантна со постојано проширување на своите AI-поддржани производи.
Лансирањето на пазарот за агенти доаѓа во време кога интересот за AI-асистенти кои можат да извршуваат задачи автономно, како виртуелни лични асистенти, расте. Според основачот и извршен директор Ховханес Авојан, целта е креаторите да ја префрлат улогата од „оператори“ на своите проекти во улога на стратеги, додека агенти како Flair, Resize Pro, Remix и Swap се грижат за извршување на задачите користејќи реални податоци и алгоритми за оптимизација.
Најнапредниот агент, Flair, се интегрира со Shopify и им помага на сопствениците на онлајн продавници да ја подобрат визуелната конзистентност на своите производи, анализирајќи трендови и препорачувајќи измени. Идни ажурирања ќе овозможат A/B тестирање и идентификување на слабо продавачки производи за подобрување на продажбата. Resize Pro ја прилагодува големината на слики и видеа за различни платформи, користејќи AI за генеративно проширување на рамката кога оригиналниот материјал не е соодветен. Remix, пак, овозможува трансформација на фотографии според избран стил како „вintage film“ или „cyberpunk“, и менување на заднините на повеќе фотографии одеднаш.
Picsart ја олеснува комуникацијата со агенти како Flair преку WhatsApp и Telegram, со можност за проширување на функционалноста и на други платформи. Корисниците можат да постават „нивoа на автономија“ за агенти, со што се бара одобрување од креаторот пред било каква акција, што ја намалува можноста за несакани или погрешни интервенции од AI. Платформата нуди бесплатен план со ограничени AI кредити неделно, додека премиум претплатите, почнувајќи од околу 10 долари месечно при годишно плаќање, овозможуваат поголем капацитет за користење на AI агенти.
