Amazon отвора посебен онлајн продавница за артикли со брза достава
Amazon ја проширува својата понуда за брза достава во САД, воведувајќи опции за едночасовна и тричасовна испорака во голем број градови, со цел да се натпреварува со компании како Instacart, DoorDash и Uber Eats. Новиот систем ќе овозможи повеќе од 90.000 производи да бидат достапни за брза испорака, а корисниците ќе можат да видат ознака покрај производите кои можат да бидат доставени во рок од еден или три часа. Дополнително, на апликацијата и веб-сајтот на Amazon ќе биде достапен филтер за овие нови опции.
Претплатниците на Amazon Prime ќе плаќаат 9,99 долари за едночасовна испорака и 4,99 долари за тричасовна, додека корисниците без Prime ќе мора да платат 19,99 долари за едночасовна и 14,99 долари за тричасовна достава. Компанијата најави дека едночасовната испорака ќе биде достапна во стотици градови, вклучувајќи делови од метрополите Лос Анџелес, Чикаго и Вашингтон, како и во помали градови како Дес Моинс, Бојзи и Американ Форк. Тричасовната опција ќе биде достапна во повеќе од 2.000 градови и населени места низ целата земја.
За полесно пристапување до овие производи, Amazon исто така ќе воведе посебен онлајн продавница што ќе ги содржи сите артикли погодни за брза достава. Удит Мадан, старши потпретседател за светски операции во компанијата, изјави дека целта е да се помогне на клиентите да заштедат време и да го олеснат управувањето со домаќинството, при што Prime членството добива дополнителна вредност.
За новите опции ќе се користат постојните логистички и дистрибутивни капацитети на Amazon за испораки истиот ден. Иако компанијата претходно веќе пробуваше со едночасовна достава преку услугата Prime Now од 2014 до 2021 година и неодамна тестираше 30-минутна испорака во Сиетл и Филаделфија, новиот потег е дел од пошироката стратегија за брзата трговија. Сервисот за итни испораки се шири и на меѓународно ниво, со Amazon Now во Индија и сервисот во Обединетите Арапски Емирати, кој ветува достава за 10 до 15 минути.
