Нови SUV и електрични модели како клуч за закрепнување на Audi

Премиум групата на Volkswagen, предводена од Audi, очекува подобрување на профитабилноста во текот на годинава, потпирајќи се на нови модели и мерки за зголемување на ефикасноста во услови на силна конкуренција и трговски притисоци. Во групата, покрај Audi, влегуваат и брендовите Lamborghini, Bentley и производителот на мотоцикли Ducati.

Според најавите, оперативната профитна маржа на ова портфолио би требало да се движи меѓу 6 и 8 проценти, што претставува раст во однос на минатогодишните 5,1 процент. Ваквите проекции доаѓаат во период кога матичната компанија се обидува да ги стабилизира Audi и Porsche, чии резултати значително ослабнаа поради високите трошоци поврзани со стратегијата за електрични возила, американските царини и падот на продажбата на кинескиот пазар.

Финансискиот директор на Audi, Јирген Ритерсбергер, изјави дека долгорочната цел на брендот е постепено враќање на двоцифрена профитабилност до крајот на деценијата. Минатата година, оперативната маржа на Audi се намали на 3,9 проценти, делумно под влијание на царинските давачки и трошоците за ревизија на претходните планови за електрификација.

Дополнителен товар за групата претставуваат и регулаторните барања поврзани со емисиите на јаглерод диоксид, како и американските царини, кои лани достигнаа околу 1,2 милијарди евра. Во обид да ги намали трошоците, компанијата планира и намалување на работната сила во Германија за околу 7.500 работни места до 2029 година.

Во стратегијата за закрепнување клучна улога ќе имаат новите модели. Во Европа, Audi планира да ја засили понудата со компактниот електричен A2 e-tron, додека за американскиот пазар се подготвува големиот SUV модел Q9, кој треба да одговори на побарувачката за поголеми возила. Недостатокот од вакви модели досега негативно се одразуваше врз продажбата во САД.

Истовремено, компанијата се соочува со предизвици и во Кина, каде што домашни производители како BYD и Xiaomi нудат напредни електрични возила по поконкурентни цени. Иако падот на испораките е забавен, трендот останува негативен. Како дел од обидите да ја зајакне позицијата на овој пазар, Audi најави нов модел развиен специјално за Кина во соработка со партнерот SAIC, кој ќе биде претставен на претстојниот автомобилски саем во Пекинг.