Вештачката интелигенција на Amazon ќе им помага на лекарите со документација и термини
Компанијата Amazon преку својата cloud дивизија Amazon Web Services претстави нов пакет алатки базирани на вештачка интелигенција наменети за здравствени установи, со цел да се намали административниот товар со кој секојдневно се соочуваат лекарите и медицинскиот персонал. Новата платформа, наречена Amazon Connect Health, е дизајнирана да им помогне на медицинските практики полесно да ги управуваат разговорите со пациентите, медицинската документација и закажувањето на прегледи.
Со помош на вештачка интелигенција, системот може автоматски да создава белешки од разговорите меѓу лекарите и пациентите во текот на самата консултација. Покрај тоа, алатката може да додава кодови поврзани со симптоми, медицински процедури и наплата на услуги, како и да прави кратки резимеа од постојните здравствени досиеја на пациентите. Платформата исто така е наменета да помогне во проверка на идентитетот на пациентите, како и во закажување и управување со термини.
Главниот медицински директор на AWS, Rowland Illing, истакна дека здравствениот сектор е силно оптоварен со административни процедури и сложени процеси кои одземаат значителен дел од времето на медицинскиот персонал. Според него, токму тука технологиите базирани на вештачка интелигенција можат да придонесат за поефикасна работа и да им овозможат на лекарите повеќе време да се фокусираат на грижата за пациентите.
Со оваа иницијатива Amazon се приклучува на сè поголемиот број технолошки компании кои инвестираат во решенија за модернизација на здравствениот сектор. Меѓу нив се и Microsoft, Google во сопственост на Alphabet, како и Oracle, кои развиваат различни алатки за автоматизација на административните процеси во здравството.
Иако AWS и понатаму е најголемиот светски провајдер на услуги за изнајмување компјутерска моќ, складирање на податоци и cloud инфраструктура, компанијата досега имаше ограничен успех во развојот на софтвер наменет за канцелариска работа. Во последниот период Amazon дури и се повлече од некои производи како видео-конференциски и системи за споделување датотеки, додека во исто време продолжи да инвестира во нови решенија базирани на вештачка интелигенција.
Поголем успех компанијата постигна со платформата Amazon Connect, наменета за кол-центри, која според претходни проценки на компанијата има потенцијал да генерира околу една милијарда долари годишен приход. Дел од функциите на новата здравствена платформа се директно интегрирани токму со овој систем.
Новата услуга Amazon Connect Health веќе е достапна за користење. Функцијата за автоматско креирање медицинска документација ќе чини 99 долари месечно, додека услугата за проверка на идентитет на пациентите ќе се наплаќа по 15 центи за секој разговор. Компанијата засега не објави цена за останатите функции, кои сè уште се во тест фаза.
