Nvidia нема да инвестира 100 милијарди долари во OpenAI, вели Џенсен Хуанг
Извршниот директор на Nvidia Corp., Jensen Huang, изјави дека не очекува инвестициите на компанијата во OpenAI да достигнат 100 милијарди долари, иако токму толкав максимум претходно беше споменуван како можност. Говорејќи на конференција организирана од Morgan Stanley во Сан Франциско, Хуанг посочи дека плановите на OpenAI за излегување на берза, потенцијално до крајот на годината, ја менуваат динамиката на идните вложувања. Според него, можноста за толку голема инвестиција најверојатно повеќе не е реална.
Минатиот месец Nvidia вложи 30 милијарди долари во голема рунда финансирање вредна вкупно 100 милијарди долари, со што OpenAI беше проценета на 730 милијарди долари. Иако станува збор за најголемата поединечна инвестиција на Nvidia во една стартап-компанија досега, износот беше значително помал од првично разгледуваната сума од 100 милијарди долари. Ова поттикна шпекулации за односите меѓу водечката AI компанија и најголемиот светски производител на чипови за вештачка интелигенција.
Хуанг се осврна и на инвестицијата од 10 милијарди долари во Anthropic, конкурент на OpenAI и креатор на платформата Claude, оценувајќи дека и тоа веројатно ќе биде последно поголемо вложување во таа компанија, особено поради нејзините подготовки за иницијална јавна понуда.
Осврнувајќи се на критиките од дел од инвеститорите дека ваквите вложувања може да сигнализираат прегреан пазар, Хуанг нагласи дека примената на AI технологијата веќе создава значителни приходи за компаниите, вклучително и за големи оператори на дата-центри како Microsoft Corp.. Според него, доколку овие компании располагаат со повеќе компјутерска моќ, нивниот раст би бил уште побрз, а зголемувањето на капацитетот директно би се одразило врз приходите.
Тој исто така истакна дека компании како Cadence Design Systems Inc. и Synopsys Inc., кои развиваат софтвер за автоматизиран дизајн и компјутерски системи, ќе играат сè поважна улога во иднина. Неговите коментари придонесоа за раст на акциите на Nvidia до 2,6 проценти во текот на тргувањето во Њујорк, и покрај претходната воздржана реакција на инвеститорите по објавата на последниот финансиски извештај.
Хуанг ги опиша резултатите на компанијата како исклучително силни и порача дека индустријата за вештачка интелигенција сè уште е во рана фаза на долгорочен раст, уверувајќи дека Nvidia останува во центарот на таа трансформација.
